Al-Shabaab oo si adag ka hadashay Dastuurka Cusub iyo Dad ay ku eedaysay inay Dawladda Soomaaliya Iibiso
Marka-(Berberanews)- Malleeshiyada Al-Shabaab ee ka dagaallanta Koonfurta dalka Soomaaliya, ayaa shacabka Soomaaliyeed ugu baaqay inay ka hortagaan meel-marinta Dastuurka cusub ee Soomaaliya yeelanayso, kaasoo soo xulista Ergadii ansixin lahayd lagaga shirayo Muqdisho.
Kooxda Al-Shabaab, ayaa ku doodaysa in lawado qorshe la doonayo in dastuurka qabyada ah ee Soomaaliya uu dhigayo inay Diinta Islaamka iyo Diimaha kale noqdaan kuwo ka siman Soomaaliya gudeheeda. Afhayeenka Al-shabaab, Sh. Cali Maxamuud Raage (Sh. Cali-Dheere) oo warbaahinta kula hadlay degmada Marka ee gobolka Shabeellada hoose, ayaa sheegay in qorshahan lagu simayo Diinta Islaamka iyo Masiixiga ay wadaan dalalka caawiya dowladda Ku-meel-gaadhka ah ee Soomaaliya.
Afhayeenka Al-Shabaab waxa uu sheegay inay Gaaladu si cad u sheegeen inay doonayaan in dalka Soomaaliya lagu faafiyo Diinta Kiristanka, Cali-Dheere oo arrintaa ka hadlayaana waxa uu yidhi; “Waxay Gaaladu si cad u sheegeen inay doonayaan in Soomaaliya lagu faafiyo Diinta Kirishtaanka, isla markaana ay la mid noqto Diinta Islaamka.”
Waxa uu Afhayeenka Malleeshiyada Al-Shabaab oo hadalkiisa sii wataa intaa ku daray oo uu yidhi; “Sidoo kalena ay sinnaadaan Masaajiddada iyo Kaniisaduhu, innaguna ma oggolin. Waxaanan ummadda Soomaaliyeed ugu baaqayaa inay ka hor-tagaan ansixinta dastuurkaas Diinta Islaamka lagaga soo horjeedo.”
Afhayeenka Al-SHabaab waxa uu dawladda Ku-meel-gaadhka ah ee Soomaaliya ku eedeeyey inay iibsato dadka lagu qabqabto hawlgallada ciidammada dawladda iyo kuwa AMISOM ka wadaan gudaha magaalada Muqdisho iyo deegaannada Al-Shabaab laga qabsaday ee dalka Soomaaliya, waxaanu xusay dadka hawlgallada lagu qabqabtay inaanay ku jirin cid Malleeshiyada Al-Shabaab ka tirsani.
Berberanews.com
Hargeysa/Somaliland.
Short URL: http://www.berberanews.com/?p=18361